safar me.n dhuup to hogii : Nida Fazli


safar me.n dhuup to hogii jo chal sako to chalo
sabhii hai.n bhii.D me.n tum bhii nikal sako to chalo

idhar udhar ka_ii ma.nzil hai.n chal sako to chalo
bane banaaye hai.n saa.Nche jo Dhal sako to chalo

kisii ke vaasate raahe.n kahaa.N badalatii hai.n
tum apane aap ko Khud hii badal sako to chalo

yahaa.N kisii ko koii raastaa nahii.n detaa mujhe
giraake agar tum sambhal sako to chalo

yahii hai zindagii kuchh Khvaab chand ummiide.n
inhii.n khilauno.n se tum bhii bahal sako to chalo

har ik safar ko hai mahafuus raasto.n kii talaash
hifaazato.n kii rivaayat badal sako to chalo

kahii.n nahii.n ko_ii suuraj, dhuaa.N dhuaa.N hai fizaa
Khud apane aap se baahar nikal sako to chalo

main jahaa.N tum ko bulaata hu.N wahaa.N tak aao: Ali Sardar Jafri

main jahaa.N tum ko bulaata hu.N wahaa.N tak aao
merii nazro.n se guzar kar dil-o-jaa.N tak aao

phir ye dekho ki zamaane kii hawaa hai kaisii
saath mere mere firdaus-e-jawaa.N tak aao

tegh kii tarah chalo chhod ke aaghosh-e-niyaam
tiir kii tarah se aaghosh-e-kamaa.N tak aao

phool ke gird phiro baagh mein maanind-e-naseem
misl-e-paravanaa kisii sham-e-tapaa.N tak aao

lo vo sadiyo.n ke jahannum kii hade.n Khatm huii
ab hai firdaus hii firdaus jahaa.N tak aao

chhod kar waham-o-gumaa.N husn-e-yahqii.n tak pahu.Ncho
par yaqii.n se bhii kabhii waham-o-gumaa.N tak aao

had-e-nigaah tak ye zamii.n hai siyaah phir: Shaharyar

had-e-nigaah tak ye zamii.n hai siyaah phir
nikalii hai jugnuo.n kii bhataktii sipaah phir

hontho.n pe aa rahaa hai koii naam baar baar
sannaato.n kii tilism ko todegii aah phir

pichchle safar kii gard ko daaman se jhaad do
aawaz de rahii hai koii sooni raah phir

berang aasmaan ko dekhegii kab talak
manzar nayaa talaash karegii nigaah phir

Dheeli huii giraft junu.N kii ke jal uThaa
taaq-e-hawas mein koii charaagh-e-gunaah phir

nahi.n nigaah mein manzil to justju hii sahii


nahi.n nigaah mein manzil to justju hii sahii
nahi.n visaal mayassar to aarazu hii sahii

na tan mein Khoon faraaham na ashk aankho.n mein
namaaz-e-shauq to vaajib hai be-vazuu hii sahii

kisii tarah to jame bazm maikade waalo
nahi.n jo baadaa-o-saaGar to haa-o-huu hii sahii

gar intezaar kathin hai to jab talak aii dil
kisii ke vaada-e-fardaa kii guftaguu hii sahii

dayaar-e-Ghair mein mahram agar nahi.n koii
to 'Faiz' zikr-e-watan apne ru-ba-ru hii sahii

Mujh ko yaqii.n hai: Javed Akhtar


Mujh ko yaqii.n hai sach kahatii thii.n jo bhii ammii kahatii thii.n
jab mere bachapan ke din the chaa.Nd mein pariya.N rahatii thii.n

ik ye din jab apano.n ne bhii hamase rishtaa tod liyaa
ik vo din din jab pe.D kii shaaKhein bojh hamaaraa sahatii thii.n

ik ye din jab laakho.n Gam aur kaal pa.Daa hai aa.Nsoo kaa
ik vo din jab ek zaraa sii baat pe nadiyaa.N bahatii thii.n

ik ye din jab saarii sa.Dkein ruuThii ruuThii lagatii hai.n
ik vo din jab 'aao khele.n' saarii galiyaa.N kahatii thii.n

ik ye din jab jaagii raate.n diivaaro.n ko takatii hai.n
ik vo din jab shaaKho.n kii bhii palake.n bojhal rahatii thii.n

ik ye din jab zahen mein saarii ayyaarii kii baate.n hai.n
ik vo din jab dil mein saarii bholii baate.n rahatii thii.n

ik ye ghar jis ghar mein meraa saaz-o-saamaa.N rahataa hai
ik vo ghar jisme.n merii boodhii naanii rahatii thii.n

Dr. Rahi Masoom Raza

Rahi’s journey begins on 1st September, 1927 in Gangauli, a small village in the Ghazipur district of Uttar Pradesh and ends with his vaseeyat in which he wills that he be laid to rest in the lap of Ganga, whom he considered his second mother. He passed away on 15 March 1992. In his career spanning 35 years, Rahi Masoom Raza has written lyrics, dialogues and stories for various movies and television series. His high came with the telecast of TV series 'Mahabharat' that was based on the Hindu epic Mahabharat. Rahi, a Muslim, wrote the screenplay and dialogue of the TV series that went on to become the most watched TV series in India. At one time, its TRP was a staggering 86 %. This was a triumph for Rahi as some Hindu zealots had criticized his inclusion in the team.


Hum kaisaa geet likhe.n


dil ke ujle kaghaz par hum kaisaa geet likhe.n
bolo tum ko Gair likhe.n yaa apnaa meet likhe.n

niile ambar kii a.ngnaaii me.n taaro.n ke phool
mere pyaase honto.N par hai.n angaaro.n ke phool
in phoolo.n ko aaKhir apanii haar yaa jiit likhe.N

koii puranaa sapnaa de do aur kuchh meethe bol
lekar hum nikale hai.n apanii aa.Nkho ke kash-kol
hum ba.njaare preet ke maare kyaa sangeet likhe.n

shaam khadii hai ek chamelii ke pyaale me.n shabnam
Jamunaa jii kii ungalii pakde khel rahaa hai madhuban
aise me.n Ganga jal se Radhaa kii priit likhe.n

dil ke ujle kaghaz par ham kaisaa geet likhe.n

saKht muqaam : Dilawar Fighar


jadaa-e-fan me.n ba.De saKht muqaam aate hai.n
mar ke rah jaataa hai fanakaar amar hone tak

kitane Gaalib the jo paidaa hue aur mar bhii gaye
qadradaan ko taKhallus ki kHabar hone tak

kitane iqbaal rah-e-fikr me.n ut.The lekin
raastaa bhuul gaye Khatm-e-safar hone tak

kitne shabbiir Hasan kha.N na bane Josh kabhii
mar gaye kitane Sikander bhii Jigar hone tak

Faiz rang bhii ashaar me.n aa sakataa thaa
ungliya.N saath to de.n Khuun me.n tar hone tak

chaand zarro.n hi ko milatii hai ziyaa-e-Khurshiid
chaaand taare hii chamakate hai.n sahar hone tak

dil-e-shaayar pe kuchh aisii hii guzartii hai 'fighar'
jo kisii qatare pe guzare hai guhar hone tak